दोलखा, १६ कार्तिक । दोलखाको पर्यटकिय नगरी जिरीमा बुधबारदेखि जिरी च्याम्पियनसिप २०८० सुरु भएको छ ।
युवा सञ्जाल जिरीद्वारा जिरी नगरपालिकासँगको सहकार्यमा सुरु भएको च्याम्पियनसिपमा बागमती प्रदेश स्तरिय अन्तर पालिका पुरुष भलिबल, जिरी भ्याली माउण्टेन सर्किट अल्ट्रा म्याराथन, स्लो बाइक रेस लगायतका विभिन्न खेलहरु सञ्चालन हुनेछन् ।
बुधबार बागमती प्रदेश सभाका सदस्य एवं कांग्रेस नेता कुन्दनराज काफ्लेले विधिवत प्रतियोगिताको सुरुवात गरेपछि भलिबल तर्फका तीन ओटा खेलहरु भए । उद्घाटन खेलमा रामेछापको गोकुलगङ्गा गाउँपालिकाले दोलखाको बैतेश्वर गाउँपालिकालाई सोझो सेटमा पराजित गर्यो । त्यस्तै दोस्रो तथा तेस्रो खेलमा क्रमशः दोलखाको कालिञ्चोक गाउँपालिकाले सिन्धुपाल्चोकको हेलम्बु गाउँपालिका र दोलखाको विगु गाउँपालिकाले जिरी ५ को टिमलाई पराजित गरे ।
कुल १७ ओटा टिम सहभागि रहेको भलिबलका बाँकी खेलहरु विहिबार विहानबाट सुरु हुनेछन् । च्याम्पियनसिप अन्तर्गतको अल्ट्रा म्याराथन पनि विहिबार विहान नै हुनेछ ।
