मैनापोखरी, २० चैत्र । ६७ औँ राष्ट्रिय सहकारी दिवसको अवसर पारेर दोलखाको जनसचेतन बचत तथा ऋण सहकारी संस्थाले आयोजना गरेको खुल्ला रक्तदान कार्यक्रममा ५२ जनाले रक्तदान गरेका छन् ।
नेपाल रेडक्रस सोसाइटी दोलखा शाखाको प्राविधिक सहयोगमा मैनापोखरी बजार स्थित संस्थाको मूख्य कार्यालय प्राङ्गणमा आयोजित रक्तदान कार्यक्रममा १३ जना महिला सहित ५२ जनाले रक्तदान गरेका हुन् । जनसचेतन साकोसका लेखा सुपरिवेक्षण समितिका संयोजक मीन प्रसाद दहालकोे अध्यक्षतामा सम्पन्न रक्तदान कार्यक्रममा वैतेश्वर गाउँपालिकाका अध्यक्ष छवि लामा, नेपाल रेडक्रस सोसाइटी दोलखाका सभापति इश्वरी दहाल लगायत संस्थाका अन्य सञ्चालक र कर्मचारीहरुको सहभागिता रहेको थियो ।
रक्तदान कार्यक्रम अघि बैतेश्वर गाउँपालिका भरका सहकारीहरुको सञ्जालले र्याली सहित बजार परिक्रमा गरेको थियो । र्याली पश्चात सहकारीमा सुशासन एवं प्रविधिमा एकिकरण विषयक अन्तरक्रिया कार्यक्रम आयोजना गरिएको थियो । कार्यक्रममा जनप्रतिनिधि, सहकारी सम्वद्ध अगुवाहरु लगायतको सहभागिता रहेको थियो ।
