सिङ्गटी, २३ चैत्र । दोलखाको कालिञ्चोक गाउँपालिका वडा नम्बर २ बाबरेमा ट्याक्टर दुर्घटनामा परी १ जनाको मृत्यु भएको छ भने ४ जना घाइते भएका छन् ।
बाबरेको पुटिस्याङ भन्ने स्थानबाट सिङ्गटी तर्फ आइरहेको लु ३ त १७१४ नम्बरको ट्याक्टर पुटिस्याङ स्थित भित्री कच्ची सडकमा दुर्घटना हुँदा सोही कालिञ्चोक २ बाबरेकी ३६ वर्षकी सन्चीमाया थामीको घटनास्थलमै ज्यान गएको हो । ट्याक्टरमा सवार कुल ६ जना मध्ये अन्य चार जना घाइते भएका छन् । घाइते मध्ये सोही स्थानकी ३० वर्षकी बाल कुमारी थामीको अवस्था गम्भिर रहेको प्रहरीले जनाएको छ । अन्य घाइतेहरुमा मृतक सन्चीमायाकी छोरी १७ वर्षकी अस्मिता थामी, ३० वर्षकी निशा थामी र ३ वर्षकी टुकी थामी रहेका छन् । उनीहरुलाई उपचारका लागि दोलखा बजार स्थित धुलिखेल अस्पताल शाखा पठाइएको छ ।
प्रहरीले ट्याक्टर चालक गौरीशङ्कर गाउँपालिका ५ बस्ने अबराम थामीलाई नियन्त्रणमा लिएको छ । मृतकको शव पोष्टमार्टमका लागि चरिकोट पशुपति चौँलागाई स्मृति अस्पताल लगिएको प्रहरीले जनाएको छ ।
